શાળાનો વિગતવાર પરિચય અને ઐતિહાસિક પ્રવાસ

ગામ ચરખા અને આસપાસના ગામો માં ધો-૭ પછીનું શિક્ષણ ઘર આંગણે મળી રહે અને કે.જી.થી ધો-૭ સુધીનુ ગુણવત્તાયુકત શિક્ષણ અને સારી શૈક્ષણિક સુવિધા મળી રહે તે માટે ગામ ચરખામાં એક આદર્શ શાળાની જરૂરીયાત જણાતા સને ૨૦૦૧ માં ગામ ચરખામાં ગ્રામજનો ધ્વારા ગામનું જ સાર્વજનિક ટ્રસ્ટ બનાવી એક આદર્શ શાળા શરૂ કરવામાં આવે તેવો નિર્ણય લેવામાં આવ્યો. પરિણામે સને ૨૦૦૧ માં ‘‘જ્ઞાનદીપ એજ્યુકેશન ટ્રસ્ટ ચરખા’’ ના નામાભિધાન સાથે ગામ ચરખામાં સામાજીક અને શૈક્ષણિક હેતુ સર જ્ઞાનદીપ એજ્યુકેશન ટ્રસ્ટ નામે ગામ ચરખાનું જ એક સાર્વજનિક ટ્રસ્ટ અસ્તિત્વમાં આવ્યું.

શરૂઆતમાં બાલમંદિર, ધો-૧ થી ધો-૪ સુધીની સુવિધા સાથેની શાળા ગામમાં જ એક મકાન ભાડે રાખી શરૂ કરવામાં આવી. ત્યારબાદ ગામ ચરખા અને આસપાસના ગામોના બાળકોને પ્રાથમિક શિક્ષણ મેળવ્યાબાદ ધો-૫ થી ધો-૧૦ અને ત્યારબાદ ધો-૧૨ સુધીનું કેળવણી યુકત સારુ શિક્ષણ મળી રહે તેવા ઉમદા હેતુને લઈને એક આદર્શ સુવિધા યુકત નવી શાળા શરૂ કરવાની જરૂરીયાત ઉભી થઈ.

ગામ ચરખાના મુળ વતની અને ગામમાં જ જન્મીને ગામમાં જ મોટા થયેલ એવા અને આઝાદી પહેલા સને ૧૯૩૫ માં અમદાવાદ જેવા શહેરમાં જઈ ઠરીઠામ થયેલ એવા શ્રીમતી જમનાબેન હરજીભાઈ રાદડીયા સને ૨૦૦૨ માં અવસાન થતા તેમની પ્રેરણાથી ગામ ચરખામાં પીપળ તળાવને કાંઠે શાળાના ટ્રસ્ટના નામે નવી જગ્યા ખરીદી ગામ ચરખા પરિવારના સહયોગથી શિક્ષણક્ષેત્રે જરૂરી એવી તમામ અદ્યતન સુવિધા સાથે કે.જી. ધો-૧ થી ધો-૧૦ સુધીની માધ્યમિક શિક્ષણ આપતી શાળા શરૂ કરવામાં આવી.
આ પ્રસંગે શાળાના નિર્માણ અને જરૂરી શૈક્ષણિક સુવિધા ઉભી કરવા જેમનો મહત્વનો ફાળો રહેલ છે. એવા ગામ બાઢડાના વતની અને સુરત ખાતે ડાયમન્ડના વ્યવસાય સાથે સંકળાયેલ પાટીદાર સમાજના શ્રેષ્ઠી શ્રી ધીરુભાઈ મોહનભાઈ વિરાણીએ શાળાની જમીન ઉપલબ્ધ કરાવવા આપેલ વિશેષ નાણાંકીય યોગદાન ની તથા શાળા ઉભી થવાથી લઈને શૈક્ષણિકક્ષેત્રે જરૂરી એવી ફર્નિચરથી માંડીને શાળા સંકુલના બાંધકામ સુધીની તમામ સુવિધા ઉભી કરવામાં જેમનુ વિશેષ આર્થિક યોગદાન રહેલ અને આજે વર્તમાન સમયમાં પણ તેમનું વિશેષ આર્થિક યોગદાન અવિરત ચાલુ રહેલ છે તેવા મુળ ગામ ચરખાના વતની શ્રીમતી જમનાબેન હરજીભાઈ રાદડિયા પરિવાર- અમદાવાદના મોભી એવા બંધુ બેલડી શ્રી ભરતભાઈ હરજીભાઈ પટેલ (રાદડિયા) અને શ્રી પ્રવિણભાઈ હરજીભાઈ પટેલ (રાદડિયા) જેમનો જન્મ અને કર્મભૂમિ અમદાવાદ રહેલ છે એવા દાતાશ્રીઓની આ પ્રસંગે વિશેષ નોંધ લેવી રહે. સાથે સાથે શાળાના મકાન નિર્માણમાં લીધેલ પ્લોટમાં વધારાની જમીનની જરૂરીયાત ઉભી થતા ગામ ચરખાના શ્રેષ્ઠી શ્રી પુરષોત્તમભાઈ ગાંડાભાઈ રાબોલિયાએ તેમની માલિકીની જમીનમાંથી શાળાની વધારાની જરૂરીયાત જેટલી જમીનનો ટુકડો વિના મુલ્યે વાપરવા કાઢી આપતા આ પ્રસંગે તેમની પણ નોંધ લેવી ઘટે.

ત્યારબાદ શાળામાં ધો-૧૦ પછી ધો-૧૧ અને ધો-૧૨ સુધીનું શિક્ષણ આપવા ઉચ્ચતર માધ્યમિક શાળાની જરુરીયાત ઉભી થતા જરુરી મંજુરી લઇ સને ૨૦૦૮ માં શરૂ કરવામાં આવી. આ માટે ગામ ચરખાના પડોશી ગામ એવા ઊંટવડ ગામના શ્રેષ્ઠી કે જે હાલમાં સુરતમાં ડાયમંડથી માંડી વિવિધ ધંધા-વ્યવસાય સાથે સંકળાયેલ છે અને ‘‘બોસ’’ ના હુલામણા નામથી પ્રચલિત છે એવા મહાનુભાવ શ્રી વલ્લભભાઈ જેરામભાઈ ધોળકિયાનો શાળાના ટ્રસ્ટને મહત્વપુર્ણ નાણાંકીય સહયોગ સાંપડયો.
તેઓશ્રીના માતૃશ્રી સ્વ. દિવાળીબેન જેરામભાઈ ધોળકિયા ના સમરણાર્થે સાંપડેલ સહયોગને કારણે ગામ ચરખામાં ધો-૧૧ અને ધો-૧૨ ની ઉચ્ચતર માધ્યમિક શિક્ષણની સુવિધા શરુ થઈ શકેલ જેને કારણે આજે સને ૨૦૦૬ ના વર્ષથી ગામ ચરખા તથા તેની આસપાસના ૧૪ ગામના સર્વે જ્ઞાતિના દિકરા દિકરીઓ લાભ લઈ રહેલ છે.

આપણી શાળાને ૨૫ વર્ષ પૂર્ણ થતા સને ૨૦૨૬ ના વર્ષને ‘‘સિલ્વર જ્યુબિલિ વર્ષ’’ તરીકે ઉજવણી કરી રહેલ છે તે અવસરે શાળા શરૂ થયેથી આજ દીન સુધી શાળાના વિકાસમાં સહભાગી થનાર અમારા તમામ માનવંતા દાતાશ્રીઓ HOF Furniture System (P) Ltd. અમદાવાદના ચેરમેન શ્રી પ્રવિણભાઇ હરજીભાઇ પટેલ (રાદડિયા) તથા JHRA FOUNDATION અમદાવાદના ચેરમેન શ્રી ભરતભાઇ હરજીભાઇ પટેલ (રાદડિયા) સમસ્ત ગામ ચરખા પરિવાર શાળાના શિક્ષણ સાથે સંકળાયેલ અમારા સર્વે શિક્ષક ગણ, અમારા શિક્ષણ કાર્યમાં નોંધપાત્ર મદદરૂપ થયેલ અને હંમેશા મદદરૂપ થવા તત્પર એવા અમારી શાળાના ભૂતપૂર્વ વિદ્યાર્થીઓ તથા શાળા ટ્રસ્ટ સાથે સંકળાયેલ અમારા તમામ ટ્રસ્ટીશ્રીઓને આ પ્રસંગે ખાસ યાદ કરી તેમની સેવા અને સમર્પણને બિરદાવીએ.

શાળા ટ્રસ્ટને ઉભુ કરવાથી લઈને ટ્રસ્ટની નોંધણી કરવી, ટ્રસ્ટના હિસાબો લખવા, પ્રતિ વર્ષે કાયદા પ્રમાણે ઓડીટ કરાવવા, ઈન્કમટેક્ષના રીટર્ન ભરવા, સરકારશ્રી ના ચેરીટી ટ્રસ્ટ ના કાયદાનું પાલન કરાવવાનું સરકારશ્રીના શિક્ષણ વિભાગના શાળા સંચાલનના નિયમોનું પાલન કરાવવાનું વગેરે જેવા જવાબદારીવાળા કાર્યો સાથે વગર વેતને છેલ્લા ૨૫ વર્ષથી ટ્રસ્ટ ઉભુ થયું ત્યારથી આજ દિન સુધી ટ્રસ્ટ સાથે સંકળાયેલ અને જ્ઞાનદીપ એજ્યુકેશન ટ્રસ્ટના મંત્રી એવા ગામ ચરખાના શ્રી વલ્લભભાઈ સવજીભાઈ ભાયાણીને આ પ્રસંગે વિશેષ નોંધ લઇ બિરદાવા રહે. શાળા ટ્રસ્ટના અન્ય ટ્રસ્ટીશ્રીઓ શ્રી અશોકભાઈ નારણભાઈ રાબોડિયા તથા શ્રી ગોપાલભાઈ લાધાભાઈ શિયાણી તથા દિવંગત ટ્રસ્ટી શ્રી અરજણભાઈ હરિભાઈ ભિમાણીનું પણ મહત્વપુર્ણ યોગદાન રહેલ છે.